“Vatikani” që përflitet se do të ndërtohet në kryeqytet, këto ditë ka qenë në qendër të vëmendjes së mediave si dhe qytetarëve të cilët kanë reaguar me anë të komenteve të tyre në botën online.
Por akoma mbetet e paqartë nëse krijimi i shtetit Sovran të Urdhrit Bektashi brenda Tiranës është një nismë e vet kryeministrit Edi Ramës apo në bashkëpunim me Kryegjyshatën Botërore të Bektashinjëve, teksa lajmi u bë me dije në gazetën amerikane “The New York Times”.
Kryegjyshata Botërore e Bektashinjëve ka reaguar së fundmi, përmes një komunikate për mediat, paralajmëron se gjatë pasditen Kryegjyshi Botëror i Bektashinjve, Haxhi Dede Edmond Brahimaj do të dalë në një deklaratë zyrtare në lidhje me këtë çështje.
Njoftimi i Kryegjyshatës Botërore e Bektashinjëve:
“Kryegjyshata Botërore Bektashiane përgënjeshtron thashethemet e fundit të qarkulluara në media në lidhje me nismën e sovranitetit të Urdhrit Bektashi. Këto raporte janë krejtësisht të pabaza. Baba Mondi, udhëheqësi shpirtëror i Urdhrit Bektashi, e mbështet plotësisht këtë nismë.
Në intervistën e tij ekskluzive me The New York Times, Baba Mondi përsëriti rëndësinë e kësaj nisme, duke deklaruar:
“Ky është një hap vendimtar drejt mbrojtjes së traditës shekullore të Urdhrit Bektashi të moderimit shpirtëror dhe përfshirjes fetare. Në një kohë kur ekstremizmi dhe intoleranca janë në rritje, kjo nismë siguron që vlerat tona të paqes dhe tolerancës mund të lulëzojnë në një shkallë globale.”
Pasditen e sotme do të ketë një deklaratë zyrtare në emër të Baba Mondit dhe Urdhrit Bektashi, duke dhënë detaje dhe sqarime të mëtejshme për këtë çështje.
Ju lutemi vini re se çdo koment ose deklaratë tjetër që i atribuohet Urdhrit Bektashi është e rreme dhe në përputhje me rrethanat do të lëshohen tërheqje. Nuk do të jepen komente të mëtejshme për këtë çështje.”