Familja e Martin Canit, të miturit që humbi jetën disa muaj më parë pas sherrit me një bashkëmoshatar, kanë reaguar përmes një deklarate mbi një episod të ngjashëm që ndodhi para disa ditësh në Maliq. Sipas familjes Cani u dëshmua se mbyllja e TikTok-ut, nuk është fundi i problemeve mes të miturve.
Ata theksojnë se tragjedia nuk ka lidhje me rrjetet sociale, por me mungesën e sigurisë dhe papërgjegjësinë institucionale: “Martini dhe Eraldi nuk u vranë nga rrjetet sociale.
Ata u vranë nga mungesa e sigurisë, nga papërgjegjësia institucionale dhe nga dështimi i sistemeve që duhet të mbrojnë jetën e fëmijëve,” thuhet në dokument.
Familja kërkon masa konkrete për përmirësimin e sigurisë në shkolla, forcimin e bashkëpunimit me familjet, angazhimin e komunitetit dhe fuqizimin e sistemit shëndetësor, duke theksuar se vetëm kështu mund të parandalohen tragjedi të tjera dhe të shpëtohen jetë fëmijësh.
Në këtë moment dhimbjeje të madhe, familja Cani shpreh ngushëllimet më të sinqerta për nënën dhe të afërmit e të miturit të vrarë dhe i bën thirrje shtetit për drejtësi dhe veprime reale.
Letra e plotë:
Deklaratë për shtyp
Megjithë mbylljen e rrjetit social TikTok nga qeveria, një i mitur tjetër u vra nga një bashkëmoshatar në Maliq. Kjo tragjedi e re tregon qartë se mbyllja e TikTok nuk ishte zgjidhje, por vetëm një pretekst politik. Kush e ka rradhën që të fajësohet tani për këtë krim të rëndë? Snapchat apo Instagram?
Ne kërkojmë që qeveria të ndërmarrë masa konkrete, jo thjesht reforma kozmetike për opinion publik. Kërkojmë veprime të dukshme dhe efektive për përmirësimin e sigurisë në shkolla, forcimin e bashkëpunimit me familjet, angazhimin e komunitetit dhe fuqizimin e sistemit shëndetësor. Vetëm me masa të tilla mund të parandalohen tragjedi të tjera dhe të shpëtohen jetë fëmijësh.
Martini dhe Eraldi nuk u vranë prej rrjeteve sociale. Ata u vranë nga mungesa e sigurisë, nga papërgjegjësia institucionale dhe nga dështimi i sistemeve që duhet të mbrojnë jetën e fëmijëve. Mbyllja e një aplikacioni nuk e kthen mbrapsht realitetin dhe nuk zgjidh problemet.
Në këtë moment dhimbjeje të madhe, shprehim ngushëllimet më të sinqerta për nënën dhe familjen e të miturit të vrarë në Maliq. E dimë se çfarë do të thotë të humbasësh dritën e jetës, dhe ndajmë me ta dhimbjen e pamasë. Zëri ynë bashkohet me të tyren në thirrjen për drejtësi dhe për masa të vërteta, që asnjë nënë tjetër të mos derdhë lot për fëmijën e saj.
Familja Cani