Avionët luftarakë të NATO-s u ngritën sot në ajër pasi Rusia ndërmori një valë të re sulmesh me dronë dhe raketa kundër Ukrainës, duke goditur objekte civile, energjetike dhe ushtarake. Pamje të rënda nga Poltava treguan banorë që bërtisnin mes flakëve dhe rrënojave, pasi një bllok banimi u shkatërrua plotësisht.
Sulmet shkaktuan ndërprerje të energjisë në disa rajone dhe vdekjen e gjashtë personave, përfshirë tre në Poltava, dy në rajonin e Sumy-t dhe një në Kharkiv.
Presidenti ukrainas Volodymyr Zelensky e cilësoi këtë si “krim terrorist”, duke theksuar nevojën urgjente për më shumë sisteme mbrojtjeje ajrore. “Çdo raketë anti-ajrore shpëton jetë. Partnerët duhet të përmbushin marrëveshjet dhe të rrisin presionin mbi Rusinë”, tha ai.
Sulmet e sotme pasuan një tjetër goditje të fuqishme në Odesa një natë më parë, ku u dëmtua qendra historike e qytetit. Ndërkohë, NATO njoftoi se avionët e saj luftarakë në Poloni dhe vende të tjera të krahut lindor u ngritën menjëherë, ndërsa sistemet e mbrojtjes ajrore u vendosën në gatishmëri të plotë.
Analistët e shohin këtë eskalim si një tregues të qartë se Vladimir Putin nuk ka ndërmend të ndalë luftën, e cila tashmë ka hyrë në vitin e tretë, pavarësisht sinjaleve të fundit për bisedime mes administratës së Donald Trump dhe Moskës.