Kryeministri Edi Rama, gjatë një takimi me gratë dhe vajzat e Gjirokastrës, komentoi thashethemet që qarkullojnë se gjysma e qeverisë është në burg. Ai e quajti këtë të pavërtetë dhe shprehu se nuk ka asnjë kompleks në lidhje me këtë akuzë. Rama theksoi se ai dhe Partia Socialiste morën një vendim të rëndësishëm që nuk ishte marrë kurrë më parë: dorëzimin e “shpatës së ndëshkimit”, e cila kishte qenë një simbol i pushtetit dhe ndikimit të politikës në drejtësi.
Sipas tij, reforma në drejtësi është thelbësore për të çliruar sistemin nga ndikimet politike dhe për të siguruar që drejtësia të godasë të gjithë pa dallim, majtas dhe djathtas. Rama u shpreh se ky ishte një akt i guximshëm dhe se ndjehej krenar përpara qytetarëve, duke theksuar se gjithmonë ka besuar në një sistem të drejtësisë të paanshëm dhe të drejtpërdrejtë.
“Ne PS, morëm një vendim që nuk e ka marrë kush përpara. Shpatën e ndëshkimit që ishte në zyrën time, e kalonin njëri pas tjetrit. E mbanin shpatën aty.
Unë e dorëzova shpatën. Na duhet një reformë në drejtësi që të çlirojë drejtësinë nga politika. Që të godasë majtas dhe djathtas. Jo vetëm që nuk kam asnjë kompleks kur këta çyrykë turren dhe përpiqen të manipulojnë popullin gjysmën e qeverisë në burg. Nuk është e vërtetë. Ndjehem kryelartë përpara jush. Dhe ju thosha ma jepni timonin pa të tjerë rrotull. Ata që më dhanë timoni, nëse drejtësia do godiste vetëm kundërshtarët do thoshin na tradhtoi”, tha Rama.