Qendra Kombëtare Operacionale e Emergjencave Civile (QKOEC) pranë AKMC bën me dije se aktualisht në vend janë raportuar 5 vatra zjarri, nga të cilat 3 janë ende aktive, ndërsa 2 po mbahen nën monitorim.
Bulqizë – Në fshatin Ternovë, njësia administrative Zerqan, vatra e zjarrit është nën kontroll. Në terren ndodhen 7 efektivë të MZSH, të cilët po punojnë për eliminimin e çdo mundësie riaktivizimi nga djegia e trungjeve të thata.
Fushë-Arrëz – Situata monitorohet në fshatrat Kulumri dhe Lumi i Trunit. Në terren janë angazhuar 50 forca të FA, të shpërndara në dy grupe për izolimin e plotë të vatrave. Aktualisht, flakët janë shuar, por puna vijon për të shmangur riaktivizimin.
Tiranë – Në Malin e Bërzhitës, në fshatrat Ibë dhe Durisht, vatra e zjarrit ndodhet në një terren të vështirë dhe të largët. Deri më tani nuk ka rrezik për banesat apo zonën pyjore.
Tiranë (Pezë–Helmës) – Zjarri i nisur në datën 10 gusht në fshatrat Damjan dhe Isufaj, i cili më 13 gusht u përhap edhe në zonën e Pezë–Helmës, vijon të jetë aktiv në disa vatra të vogla të minimizuara. Ato po mbahen nën mbikëqyrje deri në shuarjen përfundimtare.
Kolonjë – Në Parkun Natyror Gërmenj, situata paraqitet më e qetë falë ndërhyrjes së forcave operacionale, si dhe reshjeve të shiut të rëna pasditen e djeshme, të cilat kanë ndihmuar në frenimin e përhapjes së flakëve.
Autoritetet nënvizojnë se puna në terren vijon pa ndërprerje për shuarjen dhe izolimin e plotë të vatrave, duke garantuar sigurinë e banorëve dhe mbrojtjen e mjedisit.