Çmimet e kartonit jeshil për qytetarët shqiptarë që udhëtojnë me automjete në drejtim të Malit të Zi mësohet se do të kenë një kosto vjetore prej 50 euro.
Burime për Kapitali.al bëjnë me dije se aktualisht çmimi i kartonit jeshil për në Mal të Zi është 15 euro, me një afat kohor 2 javë.
Ndërkohë që njoftohet se nga data 1 Shkurt 2025 qytetarët shqiptarë do të kenë mundësinë të blejnë policën e sigurimit “Kartoni Jeshil” për autoveturat me prim të reduktuar 50 Euro, me afat 1-vjeçar.
Ulja e kostos së këtij produkti lidhet me rekomandimet e Komitetit të Përbashkët të Marrëveshjes së Tregtisë së Lirë të Evropës Qendrore (CEFTA), për marrjen e masave të ndërmjetme me qëllim lehtësimin e lëvizjes së lirë të mjeteve, Autoriteti i Mbikëqyrjes Financiare ndërmori një proces konsultimi dhe koordinimi me Byronë Shqiptare të Sigurimit (BSHS) për marrjen e këtij vendimi.
Sipas vendimit të Byrosë së Sigurimeve, qytetarët shqiptarë mund të pajisen me policën e sigurimit “Karton Jeshil” me vlefshmëri 12-mujore nga data e lëshimit, e cila mbulon ekskluzivisht territorin e Malit të Zi. Polica e sigurimit mund të blihet në pikat e kalimit kufitar të Muriqanit, Hanit të Hotit, Grabomit dhe Vermosh.
Kartoni Jeshil është një dokument sigurimi ndërkombëtar, që mbulon përgjegjësitë e drejtuesve të mjeteve me targa shqiptare në rast aksidenti gjatë qarkullimit jashtë territorit të vendit.