Kryeministri Edi Rama i është përgjigjur me ironi deklaratës së simpatizantit demokrat Ilir Vrenozi, i cili gjatë një takimi të Sali Berishës në Korçë u shpreh me gjuhë të ashpër dhe ofenduese ndaj tij.
Gjatë fjalës së tij, Vrenozi ndër të tjera u shpreh:
“Që ta çojmë tek 5 do të votojmë 1. Doktor Berisha, legjenda e demokratëve mirë se erdhe. Më 11 maj Shqipëria përsëri do të buzëqesh. Do të lindë një shpresë e re, një pranverë e madhe. E them si një njeri i thjeshtë, i varfër si qindra mijëra të tjerë. Komunizmi dhe rilindja është pjella më e keqe e vendit tim. Duhet ta rrëzojmë këtë klikë dhe t’i bëjmë nder Shqipërisë. Demokracia do të fitojë përsëri. Ndryshimin do ta bëjmë ne dhe diaspora.”
Më tej, ai vijoi me një deklaratë direkte ndaj Ramës:
“Tani po ju flas si një Vrenoz i rritur me trahana dhe fasule. U mundua të më blinte i gjati, ky karagjoz, por unë jam i djathtë o çyryk dhe jam krenar që kokën s’ma ul dot. Ti je mësuar me shit-blerje. Po dje mo, si u the fëmijëve ‘më shihni nudo’? U trondita, dhe si prind po ta them: si nuk të erdhi turp, si nuk t’u dhimbsën fëmijët?”
Pas këtyre deklaratave, Rama reagoi përmes një postimi në rrjetet sociale, ku e ironizoi figurën e Vrenozit, duke e quajtur “1-shi i vërtetë i PD-së”.
“Po pse kot e thashë unë që Vrenozi është 1-shi i vërtetë i PD-së! Shikojeni se si e shpërthen ai një sallë të tërë me sharjet e tij ekstreme e me thirrjet ndaj fantazisë erotike të audiencës fanatike, që ta kuptoni deri në fund se çfarë kënete është PD-ja!”, shkruan Rama.
Në të njëjtin postim, ai shton me sarkazëm:
“Bufi as në ëndërr s’e kap dot atë nivel ekzaltimi të turmës së habitatit të tij të lashtë. Për mua, Vrenozit i takon kapelja e Bufit deri më 11 maj dhe pas 11 majit edhe froni i mbretit të kënetës. Po ju si mendoni?”