Së fundmi është siguruar fotoja e shqiptari të identifikuar si Nikolin Nika, i cili u gjet i vdekur me 3 plagë në qafë në një trotuar përpara një lokali në Viale Delle Vittoria në Bettola të Italisë, pasditen e 24 nëntorit.
Mediat italiane raportojnë se Nika është me origjinë nga Shkodra dhe prej vitesh banues në Bettola.
Pas ngjarjes tragjike ai la pas gruan dhe dy fëmijët, njëri 9 vjeç dhe tjetri i lindur më pak se një vit më parë.
Disa orë pas krimit të rëndë, policia italiane bëri me dije se vuri në pranga një 62-vjeçar shqiptar, si autor të dyshuar të vrasjes së bashkatdhetarit të tij.
I dyshuari mësohet se është arrestuar në banesën e tij, pranë lokalit ku dhe ndodhi vrasja e Nikës.
62-vjeçari mësohet se pësoi disa lëndime në fytyrë dhe krahë, për shkak të të cilave ai me sa duket ka shkuar në shtëpinë e tij për të marrë trajtim mjekësor, ku më pas u arrestua.
Pas dëshmisë, ai u dërgua në burg dhe akuzohet për vrasje me dashje, ndërsa mësohet se mohoi akuzat.
Por vijon të mbetet i paqartë se ç’ka ndodhur mes dy shqiptarëve, por ka dyshimet se krimi ka ndodhur pas një sherri mes tyre në lokal.