Policia e Bulqizës ka dhënë detaje për aksidentin e ndodhur dy ditë më parë, ku shoferi 35-vjeçar u gjet i plagosur, por i gjallë. Policia njofton se rreth orës 18:30, një automjet i përmbysur pranë lumit në rrethrrotullimin e Shupenzës është vënë re nga disa banorë të zonës.
Pas njoftimit, uniformat blu mbërritën në vendngjarje dhe identifikuan drejtuesin e makinës, shtetasin I.N., 35 vjeç, i cili ishte shpallur në kërkim që nga dita e djeshme, pasi babai i tij kishte raportuar largimin e tij nga banesa.
I riu u gjet me shenja jete dhe u dërgua menjëherë për ndihmë mjekësore në Spitalin e Traumës. Sipas policisë, fëmijët që po laheshin në lumë ishin ata që e gjetën dhe njoftuan banorët e tjerë.
Grupi hetimor po vijon punën për të zbardhur plotësisht rrethanat e ngjarjes.
Bulqizë/informacion paraprak
Sot me datë 06.06.2025, rreth orës 18.30, shërbimet e Policisë kanë marrë njoftim se pranë rreth rrotullimit të Shupenzës, është gjetur nga disa banorë të zonës një automjet i përmbysur pranë lumit.
Menjëherë shërbimet e Policisë kanë shkuar në vendngjarje dhe nga verifikimet është identifikuar drejtuesi i automjetit shtetasi I.N., 35 vjeç, i cili ditën e djeshme ishte shpallur në kërkim, pasi babai i tij kallzoi se ishte larguar nga banesa.
35-vjeçari, është dërguar për ndihmë mjekësore në spitalin e Traumës. Grupi hetimor po punon për zbardhjen e rrethanave të këtij rasti.