47-vjeçari nga Gjirokastra, Artur Bashimi, u ekzekutua mbrëmjen e së hënës në Athinë me një plumb në kokë. Ai ishte i njohur për precedentë penalë dhe ishte arrestuar disa herë në Greqi si pjesë e grupeve kriminale që kryenin grabitje.
Viktima është vëllai i Marsel Bashimit, i njohur ndryshe si Marsel Shkurtaj apo Marsel Gozhita, i cili ka bashkëpunuar ngushtë me Bledar Jambellin dhe Kristaq Lecin, të dënuar në Shqipëri me burgim të përjetshëm si organizatorë të vrasjes së kryekomisarit Artan Cuku në vitin 2017.
Edhe vetë Marseli ka një dosje të rëndë kriminale, me akuza për plagosje, grabitje me dhunë dhe falsifikim, si në Shqipëri ashtu edhe në Greqi, ndërsa pista kryesore e hetimit për vrasjen e Arturit lidhet me larje hesapesh dhe prishje pazari droge mes grupeve rivale.