Ministrja e Punëve të Brendshme, Albana Koçiu, ka konfirmuar zyrtarisht largimin nga detyra të zëvendësministrit të Brendshëm, Andi Mahila, pasi ai u kap duke konsumuar cigare brenda një lokali, në shkelje të ligjit anti-duhan.
Ministrja njofton se denoncimi për këtë rast erdhi nga një bashkatdhetar në New York, i cili kishte shprehur shqetësim për sjelljen e zv.ministrit gjatë një vizite në restorant.
“Bëra verifikimin përkatës dhe i komunikova zv.ministrit largimin nga detyra. Çdokush mund të gabojë padashje, por të pish cigare brenda një lokali nuk është një gabim i tillë, po një shkelje e pajustifikueshme e ligjit, veçanërisht për një drejtues institucioni si Ministria e Punëve të Brendshme”, shkruan Koçiu.
Ministrja thekson gjithashtu se qytetarët që raportojnë shkelje do të dëgjohen gjithmonë me respekt dhe do të marrin përgjigje konkrete për shqetësimet e tyre.
POSTIMI I PLOTË
Konfirmoj sa ka dalë në shtyp lidhur me largimin e zëvendës ministrit.
Kam marrë një denoncim nga një bashkatdhetari ynë në New York, i cili bashkë me familjen kishte përjetuar shqetësim për faktin se zv.ministri i brendshëm tymoste cigare në restorant.
Bëra verifikimin përkatës dhe i komunikova zv.ministrit largimin nga detyra.
Çdokush mund të gabojë padashje dhe mund të mirëkuptohet , por të pish cigare brenda në lokal nuk është një gabim padashje, po një shkelje e pajustifikueshme e ligjit. Aq më tepër për një drejtues të një institucioni si ministria e punëve të brendshme.
Nga ana ime e kam njoftuar bashkëatdhetarin që dërgoi mesazhin, se shqetësimi i tij i drejtë nuk ra në vesh të shurdhër.
I siguroj të gjithë qytetarët që do të denoncojnë shkelje të cilitdoqoftë, se do të dëgjohen me të njëjtin respekt. Jo vetëm me fjalë po me qëndrimet parimore që ata me plot të drejtë presin prej nesh.