Një seri tërmetesh tronditi mëngjesin e së premtes provincën Kutahya në Turqinë Perëndimore, duke shkaktuar panik mes banorëve. Brenda 24 orëve u regjistruan gjithsej 129 paslëkundje, pas tre lëkundjeve kryesore që ndodhën me pak orë diferencë.
Lëkundja më e fortë, me magnitudë 4.6 ballë, u regjistrua në orën 10:20 në rajonin Simav, në një thellësi prej 12.17 kilometrash, sipas të dhënave nga Agjencia Turke e Menaxhimit të Fatkeqësive dhe Emergjencave (AFAD).
Pak orë më herët, në orën 07:23, një tjetër tërmet me magnitudë 4.5 goditi të njëjtën zonë, me një thellësi fokale prej 8.8 kilometrash. Vetëm gjashtë minuta më pas, në orën 07:29, një lëkundje tjetër me magnitudë 3.9 ballë u ndje në thellësinë 11.6 kilometra.
Guvernatori i provincës, Musa Isin, siguroi publikun se nuk ka pasur viktima apo dëme materiale, por njoftoi se shkollat në zonë do të qëndrojnë të mbyllura për një ditë si masë paraprake.
Ndërkohë, sizmologu Ali Ilker Bulut theksoi për CNN Turk se këto lëkundje nuk kanë lidhje me tërmetin me magnitudë 6.2 që ndodhi më parë në Stamboll.