Ish-presidenti i Shteteve të Bashkuara, Donald Trump, ka përsëritur deklaratat e tij kontraverse lidhur me të ardhmen e Rripit të Gazës, duke propozuar që SHBA të marrë kontrollin mbi këtë territor dhe ta shndërrojë në një “zonë të lirisë”.
Gjatë një tryeze në Katar me zyrtarë dhe biznesmenë, Trump u shpreh: “Kam koncepte për Gazën që mendoj se janë shumë të mira: ta bëjmë një zonë të lirisë. Duhet t’i lejoni Shtetet e Bashkuara të përfshihen.” Ai shtoi se “nuk ka mbetur asgjë për të shpëtuar” në Gazë, duke përmendur shkatërrimin masiv nga lufta dhe kushtet e vështira të banorëve që jetojnë “nën rrënoja”.
Trump është shprehur edhe më parë për këtë ide, duke thënë se SHBA-ja mund ta rindërtojë Gazën dhe ta kthejë në një vend me potencial turistik, duke e quajtur atë “Riviera e Lindjes së Mesme”.
Deklaratat e tij janë pritur me kritika të ashpra. Palestinezët e kanë dënuar këtë plan si një formë të re të spastrimit etnik dhe e kanë krahasuar me “Nakba”-n e vitit 1948, kur qindra mijëra palestinezë u dëbuan nga shtëpitë e tyre pas krijimit të shtetit të Izraelit. Ata thonë se nuk do të pranojnë asnjë plan që nënkupton largimin e tyre nga toka ku jetojnë.
Kombet e Bashkuara dhe shumë vende arabe gjithashtu kanë reaguar kundër, duke paralajmëruar se çdo përpjekje për zhvendosjen e popullsisë palestineze do të shkelte të drejtën ndërkombëtare.
Nga ana tjetër, kryeministri izraelit Benjamin Netanyahu e ka përshëndetur idenë e Trump, duke e quajtur një “vizion të guximshëm”. Ai ka konfirmuar se ka diskutuar me Trumpin për mundësinë që vende të tjera të pranojnë palestinezë të zhvendosur nga Gaza.
Lufta në Gaza ka rezultuar në një katastrofë humanitare: sipas burimeve palestineze, mbi 53.000 persona janë vrarë dhe pjesa më e madhe e territorit është shkatërruar. Konflikti nisi pas sulmit të Hamasit ndaj Izraelit më 7 tetor, ku u vranë rreth 1.200 persona dhe u morën 250 pengje. Hamasi është shpallur organizatë terroriste nga SHBA-ja dhe Bashkimi Evropian.
Deklaratat e fundit të Trump ka gjasa të ndikojnë në debatin ndërkombëtar për zgjidhjen e krizës në Lindjen e Mesme, ndërkohë që reagimet mbeten të ndara dhe tensionet në rajon të larta.