Ish-presidenti amerikan, Donald Trump, ka lëshuar akuza të forta ndaj paraardhësit të tij, Barack Obama, duke e cilësuar si “kryetar bande” dhe duke e akuzuar për tradhti dhe përfshirje në atë që e quan “krimi më i madh politik” në historinë e SHBA.
Deklaratat u bënë gjatë një interviste në Zyrën Ovale, ku Trump, i pyetur fillimisht për rastin e Jeffrey Epstein, e zhvendosi bisedën drejt një sulmi të drejtpërdrejtë ndaj administratës së mëparshme.
Sipas tij, Obama ka qenë në qendër të vendimit për nisjen e hetimit mbi ndërhyrjen e mundshme ruse në zgjedhjet presidenciale të vitit 2016, një hetim që për vite me radhë ka ndikuar në diskursin politik amerikan.
“E nisi presidenti Obama dhe ishin të gjithë aty, Joe Biden, James Comey, James Clapper dhe John Brennan. Të gjithë pjesë e komplotit,” tha Trump, duke shtuar: “Obama ishte kryetari i bandës. Ai është fajtor.”
Ai gjithashtu përmendi dokumente të deklasifikuara së fundmi nga Drejtoresha e Inteligjencës Kombëtare, Tulsi Gabbard – të cilat, sipas tij, provojnë përfshirjen e Obamës dhe zyrtarëve të tjerë në një përpjekje për ta dëmtuar politikisht.
“E saktë apo e gabuar, ka ardhur koha të ndiqen penalisht disa njerëz,” përfundoi Trump, duke lënë të kuptohet se mund të ketë veprime të ardhshme ligjore ndaj ish-zyrtarëve të administratës Obama-Biden.
Deklaratat pritet të shkaktojnë reagime të forta në skenën politike amerikane, veçanërisht në prag të garës zgjedhore.