Presidenti amerikan Donald Trump ka nënshkruar faljen zyrtare për ish-presidentin e Hondurasit, Juan Orlando Hernández, ka konfirmuar avokati i tij, Renato Stabile. Kjo lëvizje shfuqizon vendimin e mëparshëm të drejtësisë amerikane, e cila e kishte dënuar Hernández-in me 45 vite burg dhe një gjobë prej 8 milionë dollarësh për trafikim droge.
Sipas avokatit, Hernández është liruar nga burgu, gjë që konfirmohet edhe nga të dhënat e Byrosë së Burgjeve të SHBA-së, të cilat tregojnë se ai ka dalë nga një institucion ndëshkimor në Virxhinian Perëndimore.
“Në emër të Presidentit Hernández dhe familjes së tij, falënderojmë Presidentin Trump për korrigjimin e kësaj padrejtësie. Hernández është i lehtësuar që kjo periudhë e rëndë mori fund dhe mezi pret të rikthehet në jetën e tij pas gati katër vitesh në burg,” deklaroi Stabile.
Juan Orlando Hernández, që drejtoi Hondurasin nga viti 2014 deri në vitin 2022, ishte dënuar vitin e kaluar nga një gjykatë amerikane për akuza të rënda të trafikut ndërkombëtar të drogës.