Presidenti amerikan, Donald Trump, njoftoi vendosjen nën kontroll federal të ligjit në kryeqytetin Uashington, D.C., duke dislokuar edhe trupat e Gardës Kombëtare në qytet. Ai argumentoi se kjo masë është e domosdoshme për të përballuar “pushtimin” e qytetit nga “bandat e dhunshme”.
Megjithëse statistikat zyrtare tregojnë një ulje të krimeve të dhunshme në Uashington, Trump theksoi në një konferencë për shtyp në Shtëpinë e Bardhë se situata është “e paligjshmërisë së plotë dhe totale”. Ai kërkoi gjithashtu largimin e të pastrehëve nga qyteti, duke e cilësuar situatën emergjente.
Presidenti shpalli gjendjen e jashtëzakonshme dhe premtoi se ndërhyrja nuk do të kufizohet vetëm në Uashington, duke paralajmëruar se do të veprojë edhe më fuqishëm për të rivendosur sigurinë dhe rendin publik.
Trump deklaroi se Gardën Kombëtare, një forcë rezervë ushtarake, e vendos për të mbështetur zbatimin e ligjit dhe për të ruajtur sigurinë në qytet. Ky është veprimi i tij i dytë i tillë në disa muaj, pasi në qershor kishte dislokuar Gardën në Kaliforni në mënyrë të ngjashme, pavarësisht kundërshtimeve nga guvernatori demokrat Gavin Newsom.
Ndryshe nga shumica e shteteve, Uashingtoni, D.C. ka një status të veçantë ligjor dhe administrativ, që e bën qytetin më të ndërlikuar për nga marrëdhëniet me qeverinë federale.