Presidenti i Shteteve të Bashkuara, Donald Trump, dhe homologu i tij ukrainas, Volodymyr Zelensky, u takuan sot në Vatikan, pak para fillimit të funeralit shtetëror të Papa Françeskut.
Sipas Steven Cheung, drejtor për komunikim në Shtëpinë e Bardhë, të dy liderët zhvilluan një bisedë “shumë frytdhënëse”, ndërsa u konfirmua se hollësi të tjera mbi takimin do të publikohen më vonë. Sekretari për shtyp i Zelenskyt, Serhiy Nykyforov, gjithashtu konfirmoi takimin, por pa dhënë detaje mbi ndonjë vijim të bisedimeve.
Sipas burimeve të Sky News pranë Vatikanit, Trump dhe Zelensky pritet të vazhdojnë bisedimet pas ceremonisë së varrimit.
Pjesëmarrja e Zelenskyt në varrim ishte fillimisht e pasigurt, por në mbërritje ai u prit me duartrokitje nga turma në sheshin Shën Pjetri.
Ky takim shënon përballjen e parë mes dy liderëve pas përplasjeve të tyre të fundit publike në shkurt, dhe ndodh në një moment kur diplomacia amerikane ka intensifikuar përpjekjet për të ndërmjetësuar një marrëveshje paqeje në Ukrainë. Të premten, i dërguari i Trumpit, Steve Witkoff, zhvilloi një takim në Kremlin me presidentin rus Vladimir Putin.
Pas këtij takimi, Trump deklaroi se janë “shumë pranë” një marrëveshjeje për t’i dhënë fund konfliktit në Ukrainë dhe i bëri thirrje Zelenskyt që të punojë për ta përmbyllur këtë proces, duke paralajmëruar se në mungesë të një marrëveshjeje të shpejtë, SHBA mund të tërhiqet nga ndërmjetësimi.