15 gushti shënon takimin e shumëpritur të Presidentit të Shteteve të Bashkuara, Donald Trump dhe presidentit të Rusisë, Vladimir Putin, takim që pritet të nisë në orën 21:00 në Alaska, sipas kohës lokale. Ky është takimi i tyre i parë “kokë më kokë” pas gjashtë vitesh dhe vjen në kushte të tjera gjeopolitike.
Në prag të bisedimeve, Trump ka deklaruar se “Putin nuk do të guxojë të luajë me të”, duke theksuar vendosmërinë e tij për të ushtruar presion diplomatik mbi një armëpushim të mundshëm mes Rusisë dhe Ukrainës. Nga ana tjetër, presidenti ukrainas Volodymyr Zelensky është lënë jashtë takimit dhe ka paralajmëruar se çdo vendim që merret pa praninë e tij “nuk do të ketë asnjë vlerë”.
Analistët theksojnë se Putini mbetet i vendosur për të fituar territore ukrainase, ndërsa Trump synon të paraqitet si një ndërmjetës global i paqes. Lufta në Ukrainë, e nisur me pushtimin e plotë nga Rusia në vitin 2022, ka shkaktuar dhjetëra mijëra viktima nga të dyja palët.
Ndërkohë, vëmendja është e përqendruar tek zonat e shkatërruara në vijën e frontit, të cilat mbeten thelbi i negociatave të sotme. Nuk dihet nëse do ketë një “tym të bardhë”, pas këtij takimi që do të thoshte shumë për të ardhmen globale dhe të shteteve të përfshira në konflikt.
Radar.al