Presidenti amerikan Donald Trump ka vendosur një afat 50-ditor për Moskën që të arrijë një marrëveshje për t’i dhënë fund luftës në Ukrainë, duke paralajmëruar “tarifa të rënda, deri në 100%” nëse kjo nuk ndodh.
Gjatë një deklarate nga Shtëpia e Bardhë, në praninë e Sekretarit të Përgjithshëm të NATO-s, Mark Rutte, Trump tha se është “shumë i pakënaqur me Rusinë” dhe paralajmëroi pasoja të ashpra ekonomike ndaj saj nëse nuk ka progres konkret për paqen.
Në të njëjtën konferencë, Trump njoftoi se ka arritur një marrëveshje për furnizimin e NATO-s me armë të avancuara, që më pas do t’i dërgohen Ukrainës.
“Kemi një marrëveshje ku do t’u dërgojmë armë dhe ata (NATO) do të paguajnë për to. Jo taksapaguesit amerikanë, por anëtarët e Aleancës do të mbulojnë kostot,” deklaroi Trump.
Ai nënvizoi se ky është një hap i rëndësishëm drejt një zgjidhjeje ushtarake dhe politike të konfliktit, duke bërë të ditur se dërgesat do të përfshijnë bateri të raketave Patriot, të cilat do të nisen “brenda ditësh”.
“Lufta duhet të ndalet. Këto janë pajisje ushtarake me vlerë miliarda dollarë, që do të shkojnë në NATO dhe do të shpërndahen menjëherë në fushëbetejë,” shtoi ai.
Deklaratat e Trump vijnë në një moment kritik për sigurinë në Europë dhe rolin e SHBA në aleancën transatlantike, duke rritur presionin diplomatik mbi Kremlinin dhe njëkohësisht duke riafirmuar mbështetjen për Ukrainën – këtë herë me kushte të reja financiare dhe strategjike.