Një incident i rëndë është regjistruar në Serbi, ku një burrë ka tentuar t’i vërë flakën vetes përpara ambienteve të selisë së Partisë Përparimtare Serbe (SNS), që drejtohet nga presidenti Aleksandar Vuçiç.
Sipas mediave vendase, burri, i identifikuar si Milomir Jaçimoviç, mbërriti në vendngjarje me një shishe benzine dhe një shkrepëse. Në momentin kur po përgatitej për të ndërmarrë aktin ekstrem, forcat e xhandarmërisë ndërhynë me shpejtësi dhe e arrestuan, duke parandaluar një tragjedi të mundshme.
Jaçimoviç, që punon si transportues, është i njohur për përfshirjen e tij aktive në protestat studentore që prej nisjes së tyre. Ai ka transportuar vullnetarisht studentë drejt lokacioneve ku zhvilloheshin tubime dhe demonstrata, një angazhim që sipas tij i ka shkaktuar kosto të mëdha personale dhe materiale.
Në deklaratat e dhëna para të pranishmëve, Jaçimoviç tregoi se është përballur me presione të vazhdueshme për shkak të qëndrimit të tij pro-protestave, përfshirë edhe dëmtimet e përsëritura të makinës së tij, të cilat i atribuoi mbështetësve të partisë në pushtet, SNS.
Ai u shpreh se vështirësitë dhe presioni i vazhdueshëm e kanë çuar në një gjendje të rënduar psikologjike, që kulmoi me përpjekjen për vetëvrasje.