Një ngjarje e rëndë ka tronditur futbollin në rajon. Trajneri i Radnički 1923, Mladen Žižović, ka ndërruar jetë mbrëmjen e së dielës pasi pësoi kolaps në fushë gjatë ndeshjes së SuperLigës së Serbisë kundër Mladost Lučani. Ai ishte vetëm 44 vjeç.
Sipas mediave serbe, Žižović u rrëzua papritur pranë vijës anësore në pjesën e parë të takimit. Stafet mjekësore ndërhynë menjëherë për reanimim, por përpjekjet rezultuan të kota. Ndeshja u ndërpre menjëherë, ndërsa lojtarët dhe stafet mbetën të tronditur nga tragjedia.
Žižović ishte një emër i njohur në futbollin ballkanik, si lojtar dhe më pas si trajner. Ai spikati me Zrinjski Mostar, ndërsa në sezonin 2010/11 veshi edhe fanellën e KF Tiranës në Kategorinë Superiore.
Pas tërheqjes nga futbolli aktiv, ai drejtoi një sërë skuadrash në rajon, mes tyre Radnik Bijeljina, Zrinjski Mostar, Sloboda Tuzla, Shkupi, Borac Banja Luka dhe së fundmi Radnički Kragujevac, ekip që mori në drejtim vetëm një muaj më parë.
Klubet dhe federatat e futbollit në Serbi, Bosnje, Maqedoni të Veriut, Slloveni dhe Shqipëri kanë shprehur ngushëllimet e tyre për humbjen e parakohshme të trajnerit.
“Një njeri i mirë, një trajner pasionant dhe një figurë që e jetonte futbollin,” – thuhet në mesazhet përkujtimore të shumë prej klubeve që ai ka përfaqësuar.