Një tragjedi e rëndë ka ndodhur në Mesdhe, ku një anije me rreth 70 emigrantë nga Afrika Subsahariane u përmbys pranë brigjeve të Salakta, në juglindje të Mahdias, Tunizi. Si pasojë, 40 persona, përfshirë disa të porsalindur, kanë humbur jetën.
Autoritetet lokale njoftuan se 30 emigrantë të tjerë u shpëtuan nga njësitë e rojes bregdetare. Anija e vogël prej hekuri konsiderohet si një nga rrugët e pakta të disponueshme për personat më të varfër që përpiqen të largohen nga Tunizia.
Kjo tragjedi vjen vetëm një javë pas një mbytjeje tjetër midis Maltës dhe Lampeduzës, ku humbën jetën 23 persona.
Zyra e prokurorit ka hapur një hetim për rrethanat e ngjarjes, por ende nuk janë dhënë detaje mbi shkaqet e përmbysjes së anijes apo operacionet e shpëtimit.