GREQI– “Uji nga Shqipëria apo nga Sayada?”- me këtë titull hapet faqja e parë e gazetës greke Corfupress. Duke ju rikthyer sërish problemit më jetik për Korfuzin, por edhe për Lefkadhën, mungesës së ujit të pijshëm.
Autoritetet greke janë të shqetësuara për verën e këtij viti dhe fatin e Korfuzit pasi nuk dinë si ta përballojnë problemin që kërcënon mirëqenien e banorëve dhe rrjedhën e turizmit teksa bëhet fjalë për furnizimin me ujë.
Sikurse shkruajnë edhe mediat vendase, në Korfuz, me iniciativën e Guvernatorit të qarkut Yiannis Trepeklis në bashkëpunim me kryetarët e bashkive si dhe me ndërhyrje në pushtetin qendror, kërkohen ‘rrugëzgjidhje’ me një tubacion nga Greqia kontinentale, ndërsa në Lefkada, tubacioni ekzistues që furnizon ishullin, thuajse është jashtë funksionit.
Mediat greke shkruajnë se organet lokale kanë vijuar kontaktet me zyrtarë të lartë të qeverisë, ku thuhet se kanë marrë “dritën jeshile” për të parë si zgjidhje premtuese, marrjen e ujit përmes një tubacioni nënujor drejt Korfuzit nga burimet në Syrin e Kaltër të Shqipërisë.
Më tej Corfupress raporton se qeveria greke duket se konsideron këtë projekt si mundësi e bashkëpunimit ndërshtetëror, që nuk do të ndikohet nga tensionet ndoshta të përkohshme që krijohen mes dy vendeve.
Gjithashtu në artikullin e medias greke flitet për faktin se zona e jugut të Italisë pritet të furnizohet nga burimet ujore të Gjirokastrës, me një projekt që diskutohet kohët e fundit në programet trans-evropiane të financuar nga qeveria italiane, për ndërtimin e një tubacioni nënujor 85 km të gjatë me një kosto prej rreth 1 mld euro.
“Furnizimi me ujë i Korfuzit do të ekzaminohet nga baza zero.”-tha Kyriakos Mitsotakis për Yiannis Trepeklis gjatë ceremonisë së inaugurimit të projektit për krijimin e një gazsjellësi të ri nga Prefektura e Epirit në Lefkada, Arta dhe Preveza.
Në këtë aktivitet, si dhe në takimin që i parapriu, Guvernatori i Qarkut i Ishujve Jon ngriti me Kryeministrin çështjen e nxehtë të problemit të furnizimit me ujë të ishullit Faiako./Radar.al