Skena paniku dhe frike u shënuan në një shkollë në zonën Blackley të Manchester, ku një nxënëse 14-vjeçare sulmoi me thikë dy bashkëmoshatarë dhe një mësuese brenda klasës.
Mësuesja, 27 vjeçe, mbeti e plagosur në qafë ndërsa përpiqej të mbronte nxënësit dhe t’i merrte armën e ftohtë adoleshentes. Nga sulmi u lënduan gjithashtu një vajzë dhe një djalë 14-vjeçar, të cilët pësuan plagë në shpatull dhe në vesh.
Policia ndërhyri menjëherë, arrestoi autoren e dyshuar dhe konfirmoi se nuk ka rrezik të mëtejshëm për shkollën apo komunitetin përreth. Adoleshentja po hetohet nën dyshimin për shkaktim të qëllimshëm të plagëve të rënda trupore.
Pas incidentit, shkolla u vendos në izolim, ndërsa dëshmitarët përshkruan momente kaotike. Sipas tyre, disa mësues mbajtën të mbyllur derën e klasës për të penguar nxënësen të dilte dhe të sulmonte persona të tjerë.
“Ajo tentoi të largohej nga klasa për të goditur fëmijë të tjerë, por mësuesit e penguan. Mësuesja u përpoq t’ia merrte thikën, por u godit në qafë. Më pas vajza e hodhi thikën dhe u arrestua. E pashë teksa dilte me pranga”, rrëfeu një dëshmitar okular.
Raportohet se një nga nxënëset e plagosura bërtiti “Më goditën me thikë” ndërsa largohej me vrap nga klasa. Autoritetet po vijojnë hetimet për të zbardhur rrethanat dhe motivet që çuan në këtë ngjarje të rëndë.