Myftiu i Shkodrës, Imam Muhamed Sytari, ka reaguar ashpër ndaj fjalorit të përdorur nga politikanët shqiptarë gjatë fushatës elektorale, duke e cilësuar atë të papranueshëm dhe të dëmshëm për jetën publike.
Gjatë një deklarate publike, ai iu referua shkrimeve të rilindasit Mithat Frashëri (Lumo Skëndo), duke theksuar se përdorimi i një gjuhe të rëndë e të ulët është shenjë e mungesës së edukatës dhe shpirtit njerëzor.
“Personi që përdor fjalë të ndyra e të liga, është i ligë në shpirt, i paaftë për të dalluar të mirën nga e keqja, i rritur pa arsim dhe pa ndjeshmëri ndaj të tjerëve”, u shpreh Myftiu.
Ai shtoi se ky fjalor nuk vjen nga njerëz të zakonshëm, por pikërisht nga ata që mbajnë përgjegjësi për drejtimin e vendit. Për këtë arsye, bëri thirrje për distancim nga retorika fyese, duke theksuar nevojën për një komunikim të ndërtuar mbi etikë, edukatë dhe përgjegjësi qytetare.