Administrata Tatimore ka njoftuar se individët e regjistruar si tregtarë ambulantë nuk kanë detyrimin të lëshojnë faturë tatimore apo të mbajnë dokumentacion tatimor për mallrat dhe shërbimet që ofrojnë. Ky përjashtim bazohet në ligjin “Për faturën dhe sistemin e monitorimit të qarkullimit”.
Sipas ligjit “Për procedurat tatimore në Republikën e Shqipërisë”, statusi i tregtarit ambulant përcaktohet qartë dhe përfshin disa detyrime të kufizuara:
– Të jetë mbi 16 vjeç;
– Të jetë i vetëpunësuar dhe të mos ketë të punësuar të tjerë;
– Të ushtrojë aktivitetin në hapësira publike me leje nga bashkia;
– Të jetë i regjistruar pranë Drejtorisë Rajonale Tatimore si ambulant;
– Të paguajë sigurimet shoqërore e shëndetësore, tarifën për zënien e hapësirës publike dhe taksat bashkiake përkatëse.
Administrata thekson se është e përkushtuar për të ndërtuar një marrëdhënie besimi me qytetarët dhe për të siguruar zbatim të drejtë, të qartë dhe transparent të politikave tatimore për të gjithë kategoritë e kontribuesve.