Së fundmi është mësuar se çmimi i kafesë ka pësuar një rritje dhe kjo erdhi si rezultat i tarifave të reja të vendosura nga Presidenti I SHBA-së, Donald Trump.
Lajmi u bë i ditur nga mediat amerikane Financial Times dhe CNN të cilat raportojnë se tarifat, që do të prekin importet e kafesë nga Brazili, Kolumbia dhe Vietnami, rritën kështu çmimet në dyqane dhe kafene.
E gjitha kjo mësohet të ketë ndodhur në një kohë kur kostoja e farave të kafesë ka arritur nivele rekord për shkak të mungesës së furnizimit.
Çmimet e kafesë mësohet se kanë arritur nivele rekord në muajt e fundit për shkak të kushteve të pafavorshme të motit në rajonet kryesore prodhuese, përfshirë këtu Brazilin.
Nga ana tjetër çmimet e kakaos thuajse janë trefishuar gjatë vitit të fundit për shkak të motit ekstrem dhe sëmundjeve që kanë goditur të korrat, dhe pritet të rriten më tej për shkak të tarifave më të larta për importet nga Bregu i Fildishtë dhe Ekuadori.
Bregu i Fildishtë, prodhuesi më i madh i kakaos në botë, është goditur nga tarifa prej 21 për qind.
Çmimi i kafesë ka pësuar në fakt një rritje thotë CNN, që nga viti 2011 pasi moti i keq ka pllakosur rajonet kryesore të rritjes së kafesë si Brazili dhe Kolumbia.
SHBA nuk është një prodhues kafeje, me përjashtim të disa prodhimeve në Hawaii.