Presidenti i Ukrainës, Volodymyr Zelensky, u prit të hënën në Shtëpinë e Bardhë nga presidenti amerikan Donald Trump, në kuadër të një raundi të ri bisedimesh që synojnë t’i japin fund luftës në Ukrainë. Takimi vjen vetëm pak ditë pas samitit në Alaska mes Trump dhe presidentit rus Vladimir Putin, i cili nuk solli rezultate konkrete për një armëpushim.
Zelensky ndryshon tonin dhe stilin
Krahasuar me vizitën e fundit në shkurt, ku pati tensione mbi mirënjohjen e Ukrainës ndaj ndihmës amerikane, Zelensky këtë herë u tregua më i kujdesshëm dhe më i afërt. Ai falënderoi gjashtë herë në fillim të takimit dhe u shfaq me kostum të errët, duke lënë mënjanë uniformën ushtarake. Madje, me humor iu përgjigj një gazetari që e kishte kritikuar më herët për veshjen, duke thënë se kishte veshur “të njëjtin kostum” si herën e fundit, gjë që shkaktoi të qeshura në sallë.
Në një gjest diplomatik, ai i dorëzoi Trump-it një letër nga zonja e parë e Ukrainës, Olena Zelenska, për Melania Trump, vetëm pak ditë pasi vetë Melania i kishte dërguar një mesazh Vladimir Putinit gjatë samitit të Alaskës, duke bërë thirrje për mbrojtjen e fëmijëve dhe shpresën e brezave të ardhshëm.
Trump sinjalizon garanci sigurie për Kievin
Një nga temat kryesore ishte siguria e Ukrainës. Zelensky deklaroi qartë se vendi i tij ka nevojë për “gjithçka”: armë, trajnime, inteligjencë dhe mbështetje të fortë. Trump, i pyetur për këtë, la të kuptohet se SHBA do të ofrojë garanci sigurie, edhe pse pa detaje të qarta.
Ai theksoi se Evropa mbetet “vija e parë e mbrojtjes”, por shtoi se Amerika “do të jetë e përfshirë” dhe do të garantojë “mbrojtje të mirë” për Kievin. Ishte një prej deklaratave më të forta të Trump mbi angazhimin ndaj Ukrainës, ndonëse çështja e trupave amerikane në terren mbetet e paqartë.
Një takim trepalësh me Putinin?
Trump përsëriti idenë e tij për një takim trepalësh me Zelenskyn dhe Putinin, duke e cilësuar si çështje “kur, jo nëse”. Megjithatë, deri tani Kremlini ka refuzuar kategorikisht një takim të drejtpërdrejtë me Zelenskyn, duke pretenduar se pozicionet e dy vendeve janë ende shumë larg.
Sidoqoftë, Trump shpreson që përpjekjet e tij të ndërmjetësimit mund të hapin një rrugë të re për dialog. Për Ukrainën, ky takim do të ishte një shans për të testuar seriozitetin e Moskës, ndërsa për Shtëpinë e Bardhë, një mundësi për të forcuar rolin e SHBA-së në skenën ndërkombëtare si garant i paqes.
Radar.al