Pas takimit me Presidenten e Republikës së Kosovës, Vjosa Osmani, ndihmës Sekretari Amerikan i Shtetit Jim O’Brian ka ndarë detaje nga takimi i zhvilluar dy ditë më parë.
O’Brian ka shkruar në X se Amerika është krenare që e mbështet Kosovën. Më tej ai tha gjithashtu se është e rëndësishme që Kosova dhe SHBA të qëndrojnë krah për krah për të avancuar vizionin e përbashkët.
“Mirëprita Presidenten e Kosovës, Vjosa Osmani në Washington. Jemi krenarë që mbështesim shtetin sovran, multietnik dhe demokratik të Kosovës. Është e rëndësishme që të qëndrojmë në hap për të avancuar vizionin tonë të përbashkët. Diskutuam gjithashtu nevojën urgjente për të riafirmuar Dialogun e lehtësuar nga BE.”- ka shkruar O’Brien.
Ndërsa Presidentja Osmani sa i takon këtij takimi ka thënë se me Jim O’Brien kanë diskutuar për rëndësinë e bashkëpunimit me aleatët amerikanë dhe zhvillimet e fundit në dialogun mes Kosovës dhe Serbisë.
“Diskutim përmbajtjesor mbi rëndësinë e bashkëpunimit të ngushtë me aleatët tanë amerikanë për tejkalimin e sfidave të përbashkëta, si dhe për mbrojtjen e lirisë, pavarësisë dhe demokracisë sonë. Bashkë, diskutuam edhe zhvillimet e fundit në dialogun me Serbinë dhe rëndësinë e rolit të SHBA-ve për suksesin e këtij procesi.”- ka shkruar Osmani./Radar.al