Autoriteti Kombëtar i Ushqimit është përfshirë në një krizë të brendshme pas një takimi të zhvilluar pa protokoll zyrtar në ambasadën kineze, i cili ka shkaktuar një valë dorëheqjesh dhe përplasje brenda institucionit.
Burime për Ora News bëjnë me dije se dy prej drejtuesve më të rëndësishëm të AKU-së, Martin Jorgaqi (Drejtor i Menaxhimit të Riskut) dhe Leonard Muskaj (Drejtor i Komunikimit të Riskut dhe Monitorimit), kanë dhënë dorëheqjen menjëherë pas një mbledhjeje me dyer të mbyllura. Shkaku? Një vizitë në ambasadën e Republikës Popullore të Kinës, e kryer në kundërshtim me protokollin zyrtar dhe pa vënë në dijeni as Ministren e Bujqësisë Anila Denaj, as Ministrinë e Jashtme.
Ajo që e përforcon krizën është edhe fakti se Drejtori i komanduar i AKU-së, Manush Kullolli, ka qenë në dijeni të këtij takimi, por nuk ka informuar eprorët. Sipas burimeve, marrëdhëniet mes Kullollit dhe Ministres Denaj janë të tensionuara edhe për çështje të tjera. Një ndër to është mosaprovimi nga Ministria i një liste me 60 emra të propozuar nga Kullolli për krijimin e një Task Force të re brenda AKU-së.
Aktualisht, nuk dihet ende qëllimi i vizitës në ambasadën kineze dhe për çfarë është diskutuar. Por mungesa e transparencës dhe shkelja e protokollit kanë mjaftuar për të ndezur “alarmin” në institucion dhe për të sjellë trazira të brendshme, që pritet të kulmojnë me shkarkime të tjera në ditët në vijim.