Spanja po përballet me një krizë të rëndë zjarresh, teksa 14 vatra të mëdha po shkrumbojnë vendin dhe kanë marrë jetën e shtatë personave vetëm këtë muaj. Autoritetet paralajmërojnë se kushtet e pafavorshme — një valë e të nxehtit që ka zgjatur 12 ditë dhe erërat e forta nga jugu — po e bëjnë luftën me flakët edhe më të vështirë, duke e kthyer këtë verë në më të rëndën për zjarret në 20 vitet e fundit.
Sipas Virginia Barcones, drejtoreshë e përgjithshme e shërbimeve të emergjencës, situata është veçanërisht kritike në pjesën perëndimore të vendit. Në Galicia, disa vatra u bashkuan duke formuar një mega-zjarr që detyroi mbylljen e rrugëve dhe linjave hekurudhore drejt rajonit. Flakët nga provinca Ourense u përhapën edhe në Zamora, duke shkaktuar evakuime masive, ndërsa disa banorë zgjodhën të qëndrojnë për të mbrojtur shtëpitë e tyre.
Agjencia kombëtare e motit AEMET ka paralajmëruar për rrezik ekstrem në veri dhe perëndim të vendit, me temperatura që pritet të shkojnë deri në 40°C. “Sot do të jetë një tjetër ditë shumë e vështirë, me rrezik ekstrem për zjarre të reja”, shkroi në X kryeministri Pedro Sanchez.
Një nga zjarret më të mëdha në historinë e Spanjës, pranë Molezuelas de la Carballeda në Castile dhe Leon, nuk ka avancuar që nga e enjtja, sipas kreut të shërbimit të zjarreve pyjore në rajon, Angel Sanchez, por mbetet jashtë kontrollit. Shpesh, flakët përhapen me aq shpejtësi sa zjarrfikësit humbin kontrollin brenda pak minutash.
Policia ka arrestuar dy persona në Costa da Morte të Galicias, të dyshuar për ndezjen e qëllimshme të zjarreve, pasi dogjën kabllo bakri për të nxjerrë metalin dhe për ta shitur.
Deri tani, zjarret e këtij viti kanë djegur mbi 157 mijë hektarë tokë — gati dyfishin e mesatares vjetore që nga viti 2006, sipas të dhënave të Shërbimit të Informacionit mbi Zjarret Pyjore të Bashkimit Evropian.