Shteti i Spanjës ka regjistruar një numër rekord të popullsisë duke tejkaluar 49 milionë banorë.
Instituti Kombëtar i Statistikave i Spanjës (INE) ka bërë të ditur se popullsia e vendit për herë të parë ka tejkaluar këtë shifër duke evidentuar si kontribues kryesor emigracionin.
Vetëm gjatë tre muajve të fundit të 2024, Spanja pati rreth 115 mijë banorë të rinj duke kaluar shifrën 49 milionë banorë.
E gjithë kjo rritje ishte falë emigrantëve, të cilët tani përbëjnë afërsisht një të pestën e popullsisë së përgjithshme të Spanjës. Në tremujorin e fundit të vitit 2024, rreth 75 për qind e emigrantëve vinin nga tre vende, respektivisht nga Kolumbia, Venezuela dhe Maroku.
Gjithashtu numri i banorëve të lindur jashtë vendit u rrit me mbi 136 mijë, ndërsa lindjet në Spanjë shënoi një rënie me mbi 20.500. sipas raportit, lindjet patën një rekord të ulët duke arritur në koeficientin 1,12 fëmijë për grua.
Pavarësisht nivelit të ulët të lindjeve në vitet e fundit, që nga viti 1971 popullsia e Spanjës është rritur me rreth 15 milionë.