Dhjetëra agjentë të Byrosë Kombëtare të Hetimit (BKH) dhe prokurorë të SPAK kanë zbarkuar sot në Elbasan, në kuadër të një operacioni të gjerë monitorimi të procesit zgjedhor.
Ky angazhim i jashtëzakonshëm mbështetet edhe nga OSBE, SHISH dhe Agjencia e Inteligjencës Financiare, me synim garantimin e integritetit të zgjedhjeve të 11 majit. Grupi i monitorimit, i udhëhequr nga prokurori Ols Dado, është pajisur me teknologji të avancuar për të dokumentuar çdo shkelje të mundshme.
Në fokus të hetimeve janë përdorimi i burimeve publike, abuzimi me administratën, qarkullimi i parave të pista, ndërhyrja e krimit të organizuar dhe tentativat për blerje votash.
Burime zyrtare bëjnë me dije se Elbasani është ndër qarqet më të mbuluara nga hetuesit në këtë proces. Kandidatët që kapen në shkelje jo vetëm rrezikojnë të humbasin mandatin, por edhe të përballen me ndjekje penale.