Mashtrimi me kredi përmes vjedhjes së të dhënave personale nuk është më një rast i izoluar në Lezhë. Policia e Tiranës ka marrë së fundmi një kallëzim nga një 25-vjeçare, e cila pretendon se është viktimë e të njëjtës skemë mashtruese që kishte zbuluar më herët aktivitetin e dyshuar të Donika Currit në Lezhë.
E reja, që është e afërme me Donika Currin, ka zbuluar se kjo e fundit kishte përdorur kartën e saj të identitetit për të aplikuar për një kredi në shumën prej 3,500 lekësh në institucionin financiar IUTE Credit. Kjo shumë është miratuar dhe disbursuar pa dijeninë e saj.
Aplikimi, sipas burimeve, është bërë përmes aplikacionit MyIUTE, i cili kërkon të dhënat e kartës së identitetit dhe një foto “live” të aplikantit. Ende nuk dihet se si Curri ka siguruar foton e drejtpërdrejtë të 25-vjeçares, çka ngre pikëpyetje serioze për efektivitetin e sistemit të identifikimit në distancë.
Rasti i ri vjen pas raportimeve të shumta të Skyweb.al për mashtrimin e 23 grave në Lezhë nga Donika Curri, e cila u është prezantuar viktimave si përfaqësuese e një organizate bamirëse. Pasi u mori kartat e identitetit dhe fotot, ajo u premtoi përfitime nga projekte të huaja, ndërsa në realitet përdori të dhënat për të marrë kredi në emrin e tyre.
Zgjerimi i skandalit thekson mangësitë serioze në procesin e verifikimit të identitetit përmes aplikacioneve digjitale, si dhe dobësitë në vlerësimin e aftësisë paguese të klientëve. Banka e Shqipërisë ka njoftuar se ka nisur mbledhjen e informacionit mbi këto praktika, për të analizuar boshllëqet dhe për të propozuar masa mbrojtëse.