Një ngjarje tronditëse ka ndodhur në Itali, ku dhuna verbale dhe referencat makabre ndaj vrasjes së studentes shqiptare Ilaria Sula kanë kapërcyer çdo kufi etik, madje edhe në fushën e sportit.
Gjatë pushimit të një ndeshjeje të kampionatit për moshat U17 mes Sporting Terni dhe Sengemini Sport, trajneri i Sporting Terni dyshohet se hyri në dhomat e zhveshjes dhe nisi të kërcënonte gjyqtaren e ndeshjes me fjalë të rënda e tmerruese.
“Duhet të përfundosh si Ilaria Sula. Duhej të ishe vrarë kur ishe e vogël. Në raste të tilla, duhet nxjerrë thika,” janë fjalët që i atribuohen trajnerit, duke shokuar jo vetëm komunitetin sportiv, por edhe publikun e gjerë.
Pas incidentit, Liga Kombëtare e Amatorëve në Itali reagoi menjëherë, duke e përjashtuar trajnerin nga çdo aktivitet sportiv për tre vite e gjysmë.
Kujtojmë se Ilaria Sula, një studente shqiptare 24-vjeçare, u vra më 26 mars nga i dashuri i saj Mark Antony Samson, i cili më pas e futi trupin në një valixhe dhe e braktisi në një zonë pyjore pranë Romës. Rasti tronditi opinionin publik dhe u kthye në simbol të dhunës mizore ndaj grave.
Përdorimi i emrit të saj në mënyrë kaq të ulët dhe kërcënuese përbën një tjetër sinjal alarmi për situatën e dhunës verbale, psikologjike dhe sistemike në shumë fusha të shoqërisë, përfshirë edhe sportin.