Një burrë 45-vjeçar nga Firence është zbuluar si administratori i faqes së internetit Phica.eu, e cila ka qenë në qendër të një skandali për publikimin e fotove të vjedhura të personaliteteve politike, figurave me ndikim dhe aktoreve, të shoqëruara me komente seksiste.
Sipas të përditshmes Domani, bëhet fjalë për Vittorio Vitiello, i lindur në Pompeii dhe pronar i një kompanie të vogël në Itali që nga viti 2023. Hetimet e kanë identifikuar atë si administratorin e faqes Phica.eu, ndërsa është marrë tashmë në pyetje nga autoritetet në Firence.
Çështja mori përmasa më të mëdha pasi kryebashkiakja e Firences, Sara Funaro, paraqiti një ankesë, pasi edhe fotot e saj përfunduan në këtë faqe online me mbishkrime denigruese.
Prokuroria e Romës ka zhvilluar një takim të posaçëm mbi rastin, me pjesëmarrjen e zëvendësprokurorit Giuseppe Cascini, dhe pritet të hapë një dosje hetimore. Ndër akuzat që mund të ngrihen janë: përhapje e paligjshme e imazheve me përmbajtje seksuale, shpifje dhe zhvatje.