Një ngjarje shqetësuese është raportuar mbrëmjen e djeshme në Aeroportin e Beogradit, ku dhjetëra shtetas shqiptarë që udhëtonin me linjën “Air Serbia” janë përballur me një trajtim çnjerëzor nga autoritetet serbe.
Denoncimi është bërë publik këtë mëngjes nga gazetari Blendi Fevziu, i cili ndau përmes rrjeteve sociale dëshminë e një pasagjeri shqiptar, i identifikuar si Orlando, që ndodhej në fluturimin nga Beogradi drejt Shqipërisë.
Sipas dëshmisë së tij, pasagjerët shqiptarë janë mbajtur për më shumë se një orë e 20 minuta të mbyllur në një autobus, pa kondicioner, pa ndriçim dhe me mungesë të ajrit të freskët. Në pamjet filmike të shpërndara në rrjet, dëgjohen fëmijë duke qarë, ndërsa qytetarët kërkojnë llogari nga forcat e policisë serbe, të cilat qëndronin përpara autobusit pa ndërmarrë asnjë veprim për të zgjidhur situatën.
“Kjo nuk është normale. A jeni në rregull? Ka fëmijë këtu!”, dëgjohet të thotë një prej udhëtareve, teksa tensioni rritej mes të pranishmëve.
Situata, sipas dëshmive, është përkeqësuar edhe më tej pasi pasagjerët janë futur në avionin e “Air Serbia”, ku përballja me temperaturat e larta dhe mungesën e ajrit të pastër ka vazhduar.
Një grua që ndodhej në mesin e udhëtarëve ka treguar se në kulmin e panikut, vajza e saj 13-vjeçare ka marrë një pajisje emergjence dhe ka thyer një nga xhamat e autobusit për të krijuar hapësirë për frymëmarrje.
“Njerëzit po mbyteshin, fëmijët qanin, ishte një skenë e tmerrshme dhe krejtësisht çnjerëzore. Policia serbe qëndronte përballë dhe na shihte pa bërë asgjë. Vetëm pasi u thye xhami, morëm pak ajër,” – tregoi ajo.
Ky incident ka shkaktuar reagime të ashpra në rrjet dhe pritet të ngrejë shqetësime diplomatike për trajtimin e udhëtarëve shqiptarë nga autoritetet serbe. Deri më tani, nuk ka një reagim zyrtar nga “Air Serbia” apo nga autoritetet në Beograd.