Nga sot, në të gjitha aeroportet e vendeve të Bashkimit Europian nis zbatimi gradual i sistemit të ri të “Hyrje-Daljes” (Entry/Exit System – EES), që do të zëvendësojë vulat manuale të pasaportave me regjistrim elektronik dhe identifikim biometrik. Funksionimi i plotë i sistemit pritet të përfundojë në prill 2026.
Sistemi do të përfshijë qytetarët e 29 vendeve të treta (jashtë BE-së dhe zonës Schengen) që nuk kanë nevojë për vizë për të hyrë në territorin europian. Ai do të regjistrojë automatikisht çdo hyrje dhe dalje, duke mbajtur të dhëna si gjurmët e gishtërinjve, njohjen e fytyrës, emrin, datën dhe vendin e hyrjes e daljes.
Qëllimi kryesor është shkurtimi i radhëve në kufij dhe rritja e sigurisë kufitare, pasi procesi manual i vulosjes së pasaportës do të zëvendësohet nga kontrolli digjital.
Sistemi do të llogarisë në mënyrë automatike sa ditë keni qëndruar në zonën Schengen dhe sa ditë ju mbeten nga kuota 90-ditore e qëndrimit të lejuar brenda çdo periudhe 180-ditore.
Të dhënat biometrike do të ruhen për 3 vjet, ndërsa në rastet kur tejkalohen afatet e qëndrimit, për 5 vjet, përpara se të fshihen automatikisht. Nga marrja e gjurmëve të gishtërinjve përjashtohen fëmijët nën 12 vjeç.
Ky sistem është pjesë e strategjisë së BE-së për përmirësimin e menaxhimit të kufijve dhe flukseve migratore. Vetëm për fazën e projektimit janë investuar 142 milionë euro, ndërsa konsorciumi fitues përfshin kompanitë IBM (SHBA), Leonardo (Itali) dhe Atos (Francë).