Në emisionin informativ në “Breaking”, në Top News, u diskutua më tej mbi zgjedhjet e 11 majit dhe mundësitë që kanë partitë e vogla për të rrëmbyer fitroen.
Në një lidhje të drejtpërdrejtë, të ftuarit e sotëm ishin Arlind Qori, nga Lëvizja Bashkë dhe gazetari Ardit Rada.
Gjatë bisedës të zhvilluar mes tyre, Rada e pyeti Arlind Qorin për angazhimin e tij politik, duke theksuar se si ai është një pedagog i privilegjuar dhe punon nga mëngjesi deri në darkë në fushata, ndërkohë që Ministria e Arsimit nuk lejon përfshirjen e mësuesve në fushata elektorale .
“Pse Arlindi duhet të jetë një pedagog kaq i privilegjuar saqë angazhohet nga mëngjesi deri në darkë me fushatën ndërkohë që ka një memo nga Ministria e Arsimit që i ndëshkon dhe paralajmëron mësuesit për tu përfshirë në fushata elektorale apo për të kandiduar?”
Kësaj pyetjeje Qori iu përgjigj duke bërë me dije se ai nuk paguhet si pedagog sepse është pezulluar nga kjo detyrë.
“Unë jam i pezulluar nga detyra, nuk marr rrogë por ushtroj të drejtën time të jem kandidat për deputet. Kam denoncuar këto raste të plagjiaturës dhe korrupsionit, kam qenë i vetmi që e kam denoncuar, askush tjetër nuk ka bërë zë. Nuk pritet që nga një pedagog të ndryshohet gjithçka në strukturën e arsimit,” tha Qori.
Ndërsa shtoi më tej se çfarë jete modeste ai bën në mënyrë që të shmnagë tensionin.
“Kam makinë por nuk e përdor, sepse trafiku, parkingu, unë kam zgjedhur autobusin dhe s’kam pse paguaj shumë dhe të kem tensionin e timonit” përfundoi Qori.