Pas ditësh flakësh të pandërprera, mëngjesin e kësaj të mërkure është bërë eliminimi i plotë i vatrave të zjarrit në Njësinë Administrative Skënderbegas, në fshatin Kodovjak dhe tek Liqeni i Zambakëve, pjesë të Bashkisë së Gramshit.
Sipas burimeve zyrtare janë groposur rreth 170 krerë bagëti të imta të cilat u dogjën nga flakët,ndërsa numri i banesave të djegura ka shkuar në 42.
Për menaxhimin e situatës, Bashkia ka ngritur dy grupe të posaçme që po kryejnë vlerësimin e dëmeve, proces që pritet të përfundojë në ditët në vijim.
Kryebashkiaku Besjan Ajazi ka nisur prej ditësh shpërndarjen e bagëtive të imta për banorët që kanë humbur gjithçka nga zjarri, si dhe furnizimin me ushqime të familjeve të prekura, në bashkëpunim me bashki të tjera të qarkut dhe fondacione të ndryshme.
Banorët e evakuuar tashmë janë rikthyer në banesat e tyre, ndërsa përparësi mbetet rehabilitimi i zonës dhe përballimi i sfidës së rikuperimit pas dëmeve të rënda.
Radar.al