Pavarësisht se Shqipëria ndodhet në kulmin e sezonit bujqësor, çmimet e ushqimeve vijojnë të rriten, duke rritur presionin mbi inflacionin dhe duke rënduar ndjeshëm koston e jetesës për qytetarët.
Sipas të dhënave të Institutit të Statistikave (INSTAT), inflacioni për muajin qershor 2025 ka arritur në 2.4%, ku rreth 50% e kësaj rritjeje i atribuohet grupit “Ushqime dhe pije joalkoolike”, i cili kontribuon me +1.19 pikë përqindje në totalin e inflacionit.
Në tregjet e kryeqytetit, çmimet janë të konsiderueshme:
Domatet: 150 lekë/kg
Kastravecat: 100 lekë/kg
Patatet dhe qepët: 80-100 lekë/kg
Specat: deri në 180 lekë/kg
Shalqiri dhe pjepri: përkatësisht 50 dhe 100 lekë/kg
Ekspertët e tregut po paralajmërojnë se problemet strukturore në sektorin e bujqësisë, si tkurrja e sipërfaqeve të mbjella dhe ulja e numrit të bagëtive, po ndikojnë drejtpërdrejt në furnizimin e tregut, duke nxitur çmime më të larta.
Ndërkohë, abuzimet me çmimet nga grumbulluesit dhe tregtarët, si dhe mungesa e mekanizmave efektivë të kontrollit dhe mbrojtjes së konsumatorit, janë shndërruar në faktorë kryesorë që ndikojnë në rritjen e çmimeve.
Kjo situatë mbetet shqetësuese, sidomos në një periudhë kur konsumatori shqiptar do të duhej të përfitonte nga prodhimi i bollshëm sezonal dhe jo të paguante çmime që afrojnë me nivelin e importit.