GREQI– Akti heroik i një shtetasi shqiptar në shtetin helen ka bërë jehonë në të gjitha mediat greke. Bëhet fjalë për emigrantin nga Berati, Levian Goga, i cili ka shpëtuar dy fëmijë të mitur nga mbytja në lumin Arakthos, pranë fshatit Neohori të Artës.
Mësohet se ai u hodh në ujërat e thella të lumit pa menduar as për një sekondë për rrezikun që i kanosej vetë, për të shpëtuar të miturit.
Rasti i vështirë ka ndodhur mesditën e së mërkurës, ku sipas dëshmitarëve, djali më i madh u hodh për të shpëtuar mikun e tij dhe në përpjekje për ta tërhequr, e kapi nga qafa duke rrezikuar të dy.
Një i ri me motor vrapoi në kafenenë ku ndodhej Goga dhe kërkoi ndihmë: Po mbyten dy fëmijë në lumë.
Sikurse ka treguar vetë Levian Goga, ai ka reaguar menjëherë duke marrë makinën dhe duke u nisur drejt vendngjarjes për të shpëtuar fëmijët.
“Nuk më intereson kush janë, çfarë race, çfarë feje. Unë jam i huaj, por jam qenie njerëzore. U zhyta rreth tetë metra thellë. E pashë fëmijën në fund të lumit, i palëvizshëm, i nxirë. E kapa me forcë dhe e nxora. Pastaj më thanë se kishte edhe një tjetër. U zhyta sërish, disa herë, derisa e gjeta. Edhe ai kishte gjak në gojë dhe hundë. U frikësova.”– tregoi ai me zë të dridhur për mediat greke, teksa qëndronte në radhën e urgjencës në spital, me këmbën e thyer nga tentativat për të shpëtuar të miturit./Radar.al
A po dështon “shkesa” e Tares? Zbulohet shuma e kripur e De Biazit si trajner i Flamurtarit!
Aeroplani me mbi 100 persona në bord rrëzohet në Indi (PAMJET)