Një sulm me dron ka goditur hotelin luksoz Fairmont The Palm në zonën Palm Jumeirah, duke shkaktuar panik mes turistëve dhe dëme të dukshme në fasadën e ndërtesës.
Shpërthimi, që sipas dëshmitarëve u dëgjua rreth orës 18:30 të së shtunës, ndodhi teksa vizitorët ndodheshin në ambientet e hotelit. Autoritetet mbyllën menjëherë zonën përreth, ndërsa ekipet e emergjencës ndërhynë për të pastruar xhamat e thyer dhe për të garantuar sigurinë.
Derek Thompson, një turist nga Skocia që po qëndronte në hotel me familjen, tha se po darkonin kur ndodhi shpërthimi. “Ishte një shpërthim i çmendur dhe vrapuam menjëherë për t’u strehuar. Mendonim se do të kishte një tjetër, ndaj shkuam drejt plazhit për t’u larguar nga ndërtesat, nga frika se mund të shembeshin”, rrëfeu ai. Më pas familja u kthye në dhomë, por për shkak të erës së tymit vendosi të largohej më herët nga hoteli. Megjithatë, me hapësirën ajrore të mbyllur, largimi nga vendi u bë i pamundur.
Një tjetër turiste, Melissa Nicol nga Spanja, u detyrua të kthehej pas nga aeroporti pas njoftimit për mbylljen e fluturimeve. Ajo u sistemua në hotelin Five Palm Jumeirah, pranë zonës së sulmit. Pas goditjes së Fairmont, sirenat e alarmit u aktivizuan dhe mysafirët u evakuuan në bodrum, ku kaluan natën për arsye sigurie.
Deri më tani, autoritetet nuk kanë dhënë detaje mbi autorët apo motivet e sulmit, ndërsa hetimet vijojnë.