Kryeministri Edi Rama, gjatë një fjalimi në Dibër theksoi se drejtësia e pavarur që po funksionon sot në Shqipëri është produkt i Partisë Socialiste. Ai veçoi kreun e SPAK, Altin Dumanin, si një figurë të ndershme dhe të aftë, por shtoi se forca e tij buron nga mbështetja institucionale që i ka dhënë PS drejtësisë.
Ai theksoi se drejtësia nuk kursen asnjë, madje as brenda radhëve të PS, dhe ky është sipas tij një tregues force e jo dobësie.
“Altin Dumani meqë është i zonës këtej, ka qenë prokuror shumë vite. Po ky ka qenë nga Dibra, i ndershëm, i zoti i papërzier me asgjë tjetër, përveç punën e vetë. Por e kishit dëgjuar ndonjëherë Altin Dumanin të thërriste ndonjë ta merrte në pyetje, ndonjë person të njohur?! Jo. Po si u bë kaq i fortë Altin Dumani?! U bë i fortë sepse ne bëmë atë që nuk e ka bërë asnjë forcë që ka qeverisur në këtë vend që nga 1912. Ne i dorëzuam drejtësisë shpatën e ndëshkimit që i takon drejtësisë. Është për të vënë duart në kokë, kur thonë gjysma e këtyre janë në burg. Nëse sot ju të gjithë shihni barazi para ligjit për të gjithë këtë e bëri PS. Kur thosha unë që do godasë majta e djathtas, majtas për ke e kisha unë majtas? Për Noc Rrokun. Për ne pra, se ne jemi majtas. Fuqia jonë morale, karakteriale, politike, qytetare për tu ngritur mbi veten për të qenë të gatshëm për të pranuar edhe goditjet e drejtësisë kur ato vijnë brenda shtëpisë tonë dhe kur brenda shtëpisë tonë ka edhe njerëz që janë të padenjë për ne është jo arsye për të ulur kokën, por për të qenë krenarë sepse po i japim Shqipërisë diçka që nuk e ka pasur kurrë”, deklaroi Rama.