Një seancë krioterapie në një palestër në Paris është kthyer në një tragjedi. Ngjarja ndodhi të hënën mbrëma, kur një rrjedhje e padukshme e azotit në një dhomë krioterapie rezultoi fatale për një punonjëse 29-vjeçare dhe rrezikoi jetën e një klienteje 34-vjeçare, e cila aktualisht ndodhet në spital.
Çfarë është krioterapia?
Një terapi ku trupi ekspozohet për pak minuta në temperatura ekstreme, deri në -110°C, për përfitime të pretenduara mbi dhimbjet muskulore, inflamacione ose mirëqenie të përgjithshme. Kjo bëhet zakonisht me ndihmën e azotit të lëngshëm.
Çfarë ndodhi?
Sipas burimeve hetimore, ka pasur një rrjedhje të padukshme të azotit, një gaz pa erë që zhvendos oksigjenin në ajër. Të dyja gratë besohet se janë helmuar nga mungesa e oksigjenit, ndërsa është konfirmuar se pajisja ishte riparuar mëngjesin e po asaj dite.
Hetimet në zhvillim
Po drejtohen nga policia dhe inspektorati i punës. Janë urdhëruar analiza toksikologjike për të zbuluar shkakun e saktë të vdekjes, teksa është vënë në pikëpyetje funksionimi dhe mirëmbajtja e kabinës së krioterapisë
Palestra u evakuua menjëherë, ku në atë moment ndodheshin mbi 150 persona.