Xherdan Shaqiri po kalon një sezon të jashtëzakonshëm me FC Basel, ku është kthyer në liderin e padiskutueshëm të skuadrës. Me 16 gola dhe 18 asiste në 32 ndeshje, forma e tij është ndër më të mirat në karrierë.
Në një intervistë për televizionin “blue Sport”, Shaqiri ka reflektuar mbi rrugëtimin e tij, identitetin e dyfishtë dhe synimin për të ngritur një trofe me ekipin ku nisi gjithçka.
“Në fushë, padyshim jam shqiptari i pasionuar, me emocione. Megjithatë, në jetën e përditshme jam shumë zviceran – i përpiktë, i besueshëm. Mendoj se i kombinoj të dyja mentalitetet”, shprehet Shaqiri me krenari.
Futbollisti me origjinë shqiptare, i njohur për teknikën dhe goditjet e fuqishme nga distanca, tregon se ndonëse jeta e tij ka ndryshuar rrënjësisht, nuk ka harruar rrënjët dhe fëmijërinë e vështirë që e formësuan si njeri dhe si sportist.
Shaqiri shpreh gjithashtu dëshirën e madhe për të fituar një trofe me FC Basel, një objektiv personal që do ta bënte sezonin aktual të paharrueshëm.