Kompania ndërtuese “S.M.O Union”, në pronësi të biznesmenit Fernand Nuha, është përjashtuar nga pjesëmarrja në tendera për një periudhë prej 15 muajsh. Ky vendim erdhi pas zbulimit nga Agjencia e Prokurimit Publik (APP) se kompania kishte dorëzuar dokumentacion të falsifikuar në një proces tenderimi të organizuar nga Bashkia Krujë në vitin 2023.
Në 19 shtator 2024, APP miratoi vendimin nr. 85, duke njoftuar sanksionin penalizues ndaj kompanisë me seli në Shkodër. Sipas raportit të APP, “S.M.O Union” ka përdorur të dhëna të pavërteta për të fituar tenderin për asfaltimin e rrugës “Bregu i Lumit” në fshatin Gramëz, Njësia Administrative Thumanë, me një fond limit prej 270 milionë lekësh të vjetra.
Pas hetimeve, Agjencia vendosi ta përjashtojë kompaninë për 15 muaj nga pjesëmarrja në çdo proces publik të tenderimit, duke iu referuar ligjit “Për prokurimet publike”, neni 78, pika 1. “S.M.O Union”, e regjistruar në vitin 1997 me seli në Beltojë, Shkodër, është e zotëruar plotësisht nga Fernand Nuha.
Gjithashtu, të dhënat nga portali informativ “spending.data” tregojnë se kompania ka përfituar mbi 12 milionë euro nga tenderat e fituar në institucionet publike gjatë periudhës 2019-2024.
