Shtetet e Bashkuara kanë ngritur alarmin për rritjen e kërcënimeve nga Rusia dhe Kina ndaj satelitëve në hapësirë, duke paralajmëruar për veprime gjithnjë e më agresive që rrezikojnë sigurinë globale.
Sipas ish-drejtoreshës për operacione në Forcën Hapësinore të SHBA-së, DeAnna Burt, një satelit rus ka manovruar në afërsi të një sateliti amerikan në qershor të vitit të kaluar, duke lëshuar më pas një modul më të vogël që u afrua edhe më shumë me objektivin. Ajo theksoi se këto veprime janë pjesë e testeve për zhvillimin e kapaciteteve antisatelitore, përfshirë mjete potencialisht shkatërruese.
“Kemi parë operacione afrimi dhe vëzhgimi, të cilat mund të shërbejnë për identifikimin e objektivave për sulme të ardhshme”, deklaroi Burt, duke shtuar se raste të tilla janë regjistruar më parë edhe nga Rusia.
Zyrtarë të lartë amerikanë kanë paralajmëruar ndër vite për rrezikun e vendosjes së armëve antisatelitore, përfshirë edhe armë bërthamore në hapësirë, megjithëse Moska i ka mohuar këto pretendime. Raporte të fundit vlerësojnë se SHBA mbetet e cenueshme ndaj kërcënimeve të tilla dhe bëjnë thirrje për ndërtimin e arkitekturave satelitore më të qëndrueshme.
Përveç rrezikut të shkatërrimit fizik, Burt vuri në dukje se Rusia ka përdorur edhe metoda jokinetike, si sulme kibernetike dhe bllokim sinjalesh GPS, veçanërisht gjatë luftës në Ukrainë.
Ekspertët paralajmërojnë se çdo ndërprerje e kapaciteteve satelitore do të kishte pasoja serioze në Tokë, duke ndikuar në komunikime, sisteme bankare, parashikime të motit dhe operacione ushtarake.
“Të gjithë janë të cenueshëm”, theksoi Burt, duke shtuar se humbja e aksesit në hapësirë do ta bënte çdo konflikt më të vështirë dhe më të rrezikshëm.