Raportuesi i Përhershëm i Parlamentit Europian për Shqipërinë, Andreas Schieder, shprehu bindjen se vendi mund të përmbyllë të gjithë grup-kapitujt e negociatave për anëtarësim në Bashkimin Europian deri në vitin 2027.
Në një konferencë për mediat, në ambientet e Këshillit të Europës, Schieder bëri të ditur se në muajin nëntor pritet të hapet kapitulli i fundit i negociatave, çka do të thotë se Shqipëria do të jetë duke negociuar të gjithë kapitujt e procesit.
“Kjo do të thotë që viti 2026 do të jetë viti kur kapitujt do të mbyllen njëri pas tjetrit. Është një proces shumë strikt: Komisioni Europian bën vlerësimin, ndërsa Këshilli dhe Parlamenti Europian japin miratimin. Ne shikojmë nëse kushtet janë përmbushur apo jo,” deklaroi Schieder.
Ai shprehu besimin se pjesa më e madhe e kapitujve do të mbyllen gjatë vitit 2026, ndërsa në 2027 procesi mund të përmbyllet plotësisht.
Megjithatë, Schieder nënvizoi se për Shqipërinë mbetet thelbësore zbatimi real i ligjeve.
“Mundësitë janë aty, nëse bëhen gjërat që duhen bërë. Shqipëria është një vend në zemër të Europës. Turizmi tregon se shumë qytetarë të BE-së e vizitojnë dhe e shohin sa moderne është Shqipëria,” shtoi ai.
Raportuesi europian vuri theksin tek sfidat që vendi duhet të adresojë për t’u bërë pjesë e sistemit europian, si lufta kundër korrupsionit dhe krimit të organizuar, si dhe garantimi i një sistemi gjyqësor profesional dhe të pavarur.
“Procesi po ecën në drejtimin e duhur dhe shihet që Shqipëria po e merr seriozisht, duke hetuar në mënyrë të thelluar këdo – qoftë nga qeveria, opozita apo biznesi. Kjo krijon debate politike, por standardet europiane kërkojnë që drejtësia të jetë në duart e prokurorëve dhe gjyqtarëve, jo të politikanëve,” theksoi Schieder.
Duke iu referuar zgjerimit të Bashkimit Europian, Schieder pranoi se Austria është mes pesë vendeve më skeptike, por theksoi se është detyrë e politikanëve të shpjegojnë përfitimet që sjell zgjerimi.
Në përfundim, ai vlerësoi se Shqipëria ndodhet në rrugën e duhur drejt BE-së dhe duhet të vazhdojë me përkushtim në zbatimin e reformave dhe përmbushjen e standardeve europiane.