Saranda po bëhet gati për të mirëpritur mijëra turistë që do ta vizitojnë qytetin bregdetar gjatë verës dhe jo vetëm. Kreu i Shoqatës së Operatorëve Turistikë në Sarandë Arben Çipa pohon se hotelet, apartamentet dhe plazhet kanë nisur më herët nga përgatitjet.
“Të gjitha subjektet janë të involvuara në përgatitjet e tyre duke filluar nga apartamentet deri te hoteleria. Plazhet që është një çështje kryesore sidomos për sivjet kane filluar te organizohen, në fazën e asaj çka quhet përgatitja e dokumentacionit te tyre, duhet theksuar se me ndryshimin e ligjit do te kemi dhe vështirësi dhe surpriza, dhe ngatërresa në një farë forme se çdo subjekt ka të drejtë të aplikojë”, u shpreh ai.
Çipa thotë se gjatë verës duhet të ketë një vëmendje më të shtuar kryesisht për menaxhimin e trafikut dhe pastërtisë.
“Mendoj se sivjet për atë që do quhej menaxhim më i mirë në qytet, i gjithë autoriteteve, si autoriteti i trafikut, pastrimi, OSHEE, duhet të rikujtojmë gjithë këto faktorë që menaxhimi i trafikut duhet të jetë i mirëorganizuar që nga fillimi i sezonit. Rrugët e daljes në qytet të jenë me të shumta sesa ato te hyrjes në qytet. Kjo është provuar dhe ka funksionuar shumë mirë, por edhe nëse nuk funksionon është shumë e lehtë për ta ndryshuar modelin. Sa i përket çështjes se pastërtisë është diçka që duhet monitoruar çdo ditë e çdo javë derisa sezoni të thotë që tani jam unë, qetësia dhe jo zhurma e turistit.”, shtoi Çipa.
Deri më tani rezervimet në strukturat akomoduese janë premtuese, por do të jetë fundi i marsit që do të japi sinjale me të qarta për prezencën turistike të këtij sezoni. Nuk kanë munguar as turistët e organizuar me grupe.
“Mesa bisedojmë me hotelieret situata duket premtuese, por tregues është fundi i Marsit për para rezervimet, në nivelin që ato kanë arritur nga individë, por nga grupet e operatorëve situata duket e mirë, dhe rezervimet duken të jenë premtuese, kështu që besoj se do kemi serish një sezon premtues në rast se nuk krijojmë problematika për shqetësimet e vitit të kaluar, po besoj se ajo zilja që ra vitin e kaluar na ka mbetur tingulli për sivjet për t’u korrigjuar dhe për të patur një sezon të mbarë. Ajo që duket premtuese për turizmin është një pjesë e mirë me grupe turistësh grekë dhe francezë filluan sivjet herët për të vizituar qytetin tonë dhe kjo është një shenjë e mirë që do këtë vazhdimësi dhe shtim në numër të tyre.”, tha Çipa.
Ketë vit operatorët turistik në Sarandë shfaqen optimist , për një sezon më i mbarë se i shkuari.